Susa argitaletxeak apirilaren 22rako iragarri du Itxaro Bordaren poema liburu berriaren aurkezpena. Itzalen tektonika izenburupean kaleratu du Baionako idazleak bere lan berria, bere hamahirugarren poesia bilduma dena. Aurkezpena Donostian izango da, Konstituzio plazako Mandasko Dukearen aretoan goizeko 11:30ean.
Itzalen tektonika
Hamalau urterekin idaztea hil ala biziko jarduntzat deskubritzen duen norbaiten aitortzak abiatzen du Itzalen tektonika. Erdian du epizentroa, eta hark hedatzen dituen uhinak dira albo bietara datozen olerkiak. Bitoriano Gandiaga, Jeanne Dielman, Mariupol, Olot. Garai izugarri baten ikarak, poetaren paseoak eta desirak adinik ez duela ospatzen duten lerroak. Argitasunaren ehundurak eta larruaren hedadurak. Hotelak eta geltokiak, haranak eta ur-jauziak. Ostatuak eta hiztegiak aizolbe diren herri bat, basamortua eta gerra. Lurrikara baten dardara dakar Itxaro Bordaren poema liburu berriak.
