Lautadako mamua titulupean kaleratu du Elkar argitaletxeak Xabier Montoiaren nobela berria, eta irailaren 12an aurkeztuko dute Donostian idazleak berak eta Xabier Mendiguren editoreak.
2017an kaleratu zuen Xabier Montoiak orain hurrengo nobela: Hitzontziak (Susa). Bi eleberrion artean Itxaropen (Booktegi, 2019) eta Taxiak ez dira inoiz gelditzen (Susa, 2021) narrazio bildumak eta eta Hiriak eta urteak (Pamiela, 2023) poesia liburua kaleratu ditu.
Lautadako mamua
XIX. mendea sartuxea da; modernitatearen zantzu batzuk han-hemen barrundatu arren, lur-lanari eta betiko ohiturei loturik bizi da jenderik gehiena. Gizarte tradizional hura goitik behera inarrosiko du, ordea, hilketa sorta batek. Hildakoak prostitutak izan diren bitartean axola handirik ez agintariei zein legea zintzo betetzen duten kristau prestuei; halako batean, baina, emakume ondraduak akabatzen hasi dira, etxekoandre kabalak nahiz neskatila gazteak.
Lautadako paisaiaren soiltasunaz eta negu mineko hoztasunaz kontatu ditu Xabier Montoiak kondaira bihurturiko gertakariok, istorioaren laztura agerian uzten duen idazkera doi, zehatz eta ia-ia lehorrez. Krimen beldurgarrion atzean dagoen hatsa sentitzeraino, giza arimaren barrunbeetan datzan amildegiaren ertzean.
