Intxixu Ikastolako LH1 mailako ikasleen aurrean aurkeztu dute Miren Agur Meabek idazleak eta Gaston ilustratzaileak
‘Hostopostoak eta ilargi-jaia’ ipuina aurkeztu dute gaur goizean Bilboko Euskararen Etxean. Euskararen Etxeak berak argitaratu du Miren Agur Meabek idatzi eta Asier Iturralde ‘Gaston’ek ilustraturiko ipuina, eta Intxixu Ikastolako LH1 mailako ikasleen aurrean egin dute aurkezpen ekitaldia.
Miren Agur Meabek azaldu duenez, hiru helburu ditu ipuinak: “irakurketa jostagarria sustatzea, fantasia elikatzea eta hiriko umeen harreman afektiboa sendotzea euskararen ahozkotasunarekiko”.
Egiturari dagokionez, “egoera harrigarri” batetik abiatzen da kontakizuna, gero, gatazka bat gertatzen da, eta amaiera irudimentsu batekin amaitzen da.
Horretarako, hizkuntzaren “esperientzia poetikoa” baliatu du, “hizketa xume eta baliabide poetikoen” bidez”. Sinonimia ere agertzen da. “Esaterako, `hosto pila´ pertsonaien ohea da, baina, nagusiok dakigunez, `hostopila´ hojaldrea re bada. Hala, pertsonaiek hostopila egin beharko dute hostoekin eta errezeta eta osagaiak bilatu”.
Zenbait curriculum-item ere biltzen dira ipuinean: “ingurumenarekiko errespetua, liderren gaitasuna eta sormenaren garrantzia egunerokotasunean”.
Gastón ilustratzaileak, bestalde, Miren Agur Meabek aurretik sortutako izakientzat irudikatu duen unibertsoa azpimarratu du. “Oso erakargarria da unibertso hori, eta orain arte ilustratu dudan ipuinik politena izan da; irakurtzean hunkitu egiten nintzen”.
Hostopostoak
Hostopostoak izenburupean, Bilboko Euskararen Etxean egiten diren Familia-programa eta LH1, LH2 eta LH3 ikasleei zuzendutako Eskola Programa biltzen dira. Hartara, ‘Hostopostoak eta ilargi-jaia‘ ipuin-liburua Euskararen Etxeko haurrei zuzendutako eskaintza osatzera dator.
Familia-programan eta LH1, LH2 eta LH3 ikasleentzako eskola-programan parte hartzen duten taldeek doan jasoko dute Hostopostoak eta ilargi-jaia .Halaber, Euskararen Etxean bertan ere eskuratu ahalko da 5 euroren truke.
