Izenburua: Txartel bat (des)herrira
Idazlea: Garazi Goia
Argitaletxea: Elkar
Urtea: 2013
Ihesi dabiltzanen istorioa da hau. Ibai ihesi doa, bere erabakiz. Peru, besteen erabakiz. Deserrian gurutzatzen dira biak, ezustean, aldatu nahi luketen iragan bat eta baldintzazko galderak bizi dituzten bitartean: zer gertatuko zen hegazkin haien herria suntsitu ez balute? Zer gertatuko zen kotxea hartu ez banu?
Maitasun istorio bat, paperezko hegazkinetan bidalitako hitzak, bizitzako erabakiak, inoiz kontatu gabeko sekretuak, berridatzi ezin diren iraganeko kapituluak… Horek guztiek osatzen dituzte istorio honetako protagonisten bizitzak, orain, herrira itzultzea beren esku dagoela badakitenean.
Ihesa, deserrotzea eta bertakotzea moduko gaiak lantzen ditu Garazi Goiak, prosa eder eta iradokitzailez idatzitako bere bigarren nobela honetan.
Garazi Goiaren bigarren eleberri honek ez nau batere ase. Bi istorio daude liburuan, momentu batean elkartzen direnak: Peruren istorioa, gerran Ingalaterrara joandako umearena, eta Ibairena, istripua eduki eta atzerrira joandakoarena. Zer edo zer falta zaie istorioei, ez dudalako irakurketarekin gozatu. Are gehiago, egun asko eman ditut liburua hasita baina berriro hartu gabe, gogo barik nengoelako. Beraz, ezin dut liburua gomendatu.