Izenburua: Krakovia
Idazlea: Goizalde Landabaso
Argitaletxea: Erein
Urtea: 2021
«Lasai egoteko, minik ez duela ematen eta ni emakume indartsua naizela munduari aurre egiteko. Super indartsua, aizu, baina hemen nago burdinazko helduleku bati lotuta eta zulo sakon batekin izterrean. Baina ondo, e! Eta animotsu, gaur ez bainaiz hilko. Renteriari esan diot odola ez nahasteko, eta superbotereren bat duen norbaiten odola pasatzeko. Spider Woman edo Bat Woman izateko aukera eman diezadatela. Barre egin du, Superni izatearekin konformatu beharko dudala, eta ez arduratzeko, odol-bankutik fresko-fresko ekarriko didatela odola».
Igandea da, baina beste edozein egun izan zitekeen. Asteazkena edo osteguna. Inork ez du ospitalean sartu nahi igandeetan; asteazken edo ostegunetan ere ez. Inork ez du ospitaleetan sartu nahi. Zer gertatzen da, baina, aukerarik onena denean?
Eleberriko narratzaileak dagoeneko troka bilakatu den zuloa dauka haragi bizian. Infiniturantz doan hamar zentimetro zabaleko zauria izterrean. Mina barrurantz egiten duen uhina gero eta handiagoa da. Hondoratzear dagoen baporea da narratzailea. Zeri eutsi diezaiokegu zulo sakonera goazenean?
Ospitaleko Larrialdietako errezelek sortutako gelatxo batean sartu dute narratzailea; bakarrik, hara zelan heldu den oso ondo ez dakiela. Noraezean dago, galduta… Zelan biziraun, zure kontroletik kanpo dagoen egoera batean? Zerk eman diezazuke patxada egoera asaldatu honetan?
Ezinegon horretatik abiatzen da autorea bere lehen eleberri honetan. Bizitzaren atakan jarri du narratzaile protagonista, eta arma gisa ironia eta umorea eman dizkio.
Oso liburu ona Goizalde Landabasoren lehenengo eleberri hau. Aurretik, idatzita zuen narrazio-liburu bat, baita fikziozkoak ez diren beste liburu batzuk.
Eleberri honetan, pertsona bat (narratzailea) ospitaleratzen dute zauri misteriotsu bat sortu zaiolako izterrean eta bere ospitaleko egonaldia kontatuko digu. Oso ondo helarazten digu jasaten den mina, sendaketak egiten dizkiotenean, eta oso ondo kontatzen dizkigu medikuarekiko eta erizainekiko harremanak, baita ospitaleetako eguneroko bizitza. Hori guztia umorez ere kontatuta.
Azkar irakurtzen da eta inoiz ez da astuna egiten. Izan ere, nahiz eta jokalekua ospitale bateko logela txikia izan, eta nahiz eta irakurleak pentsatu handik ezin direla gauza asko atera, narratzaileak edonondik ateratzen du kontatzekoa eta beti da interesgarria.
Euskararen aldetik, oso ondo idatzita dagoela esan behar da, baita bizkaierazko hitz polit batzuk tartekatu dituela ere.
Beraz, oso gomendagarria da eleberri hau.