Naparra. Kasu irekia

1

Izenburua: Naparra. Kasu irekia
Idazlea: Jon Alonso
Argitaletxea: Elkar
Urtea: 2020

Jose Miguel Etxeberria Alvarez “Naparra”, Komando Autonomo Antikapitalistetako militantea eta Iparraldean errefuxiatua, 1980ko ekainaren 11n desagertu zen, norbaitek bahitu eta eraila. Ordutik ez da haren gorpurik agertu, ez desagerketaren egileez edo xehetasunez berri zehatzik jakin.

Jon Alonsok, era bateko eta besteko iturrietara joz, ikerketa zabal eta sakon bati ekin dio, kasu horretaz dakigun guztia biltzeko, baita suma dezakeguna iradoki eta ilunpean dagoena gogorarazteko ere. Naparra kasuaz hitz egitean, baina, gutxien-gutxienez bi kasu hartu behar ditugu aintzat: bata, indarrez desagerrarazi zuten borrokalari gazte, argi eta kementsuaren historia lazgarria; eta bestea, semearen (eta anaiaren) arrastoaren bila berrogei urtez batera eta bestera joz eta askotan bakardadean, modu nekaezinean jardun duen familiaren historia, aurrekoa bezain lazgarria edo agian lazgarriagoa.
Biak landu eta jorratu ditu egileak Debako udalak eta Elkarrek antolatzen duten Tene Mujika Bekaren laguntzaz idatzitako lan honetan, gure memoria argituz eta astinduz; izan ere, noizbait denontzat bizigarria izango den herri bat eraikiko badugu, bidean gertatu diren izugarrikeria guztiak hartu beharko baitira gogoan.

Subscribe
Notify of
guest
1 Iruzkin
Newest
Oldest Most Voted
Inline Feedbacks
View all comments
Kureiski

Jon Alonsok saiakera ikusgarria egin du Naparra kasuari buruz, gurean oso gutxitan egiten den horietarikoa.

2016an Naparra kasuak izan zuen bigarren “eztanda” modukoak akuilatuta ikerketa ezin sakonagoa egin du Alonsok. Orain arte zegoen informazioa bildu, antolatu, kontrastatu eta informazio berria bilatu du elkarrizketa eta bestelako iturrien bidez eta hori guztia nafarrak ohi duen idazketa azkar, argi eta bihurrian eman digu liburuan.

Alonsok egindako ikerketa, argitze eta antolatze lana izugarria den arren, ez dio muzin egin berak esan bezala “bustitzeari”. Egiletzari buruz ere argi hitz egiten du liburuan: “Nik zalantza gutxi daukat BVE izan zela desagerketaren erantzulea. Batere zalantzarik ez dut esango, ezer frogatu arte beti geratzen delako % 0,01 bat zalantzarako. Oso-oso tarte txikia, alegia. Are gehiago, inoiz kontrakoa demostratuko balitz, nire bizitzako ustekabea hartuko nuke”.

Jon Alonso narratzaile aparta da eta nobela ederrak utzi dizkigu, baina saiakeragile bezala sartu zen euskal literaturaren plazara eta irabazi dituen sari apurrak ere horretan irabazi ditu… bistan da ez duela saiakeragile sena galdu.

Liburu aparta kasuaz jabetzeko, euskal gatazka deiturikoan sakontzeko, etika eta moralari buruz hausnartzeko edo, liburu batek duen oinarri-oinarrizko zereginerako: irakurriz disfrutatzeko.