Elkar argitaletxeak irailaren 10erako iragarri du Amancay Gaztañagaren Martin Martina abenturazko eta fantasiazko trilogiaren lehenengo liburuaren aurkezpena: Martin Martina eta urrezko orraziaren misterioa titulupean eman dute argitara lehen zenbakia, eta Antxiñe Mendizabal editorea lagun duela aurkeztuko du idazleak Donostian.
Trilogiaren bigarren eta hirugarren zenbakiak abenduan eta 2025eko udaberrian kaleratuko dituztela aurreratu dute argitaletxetik: Martin Martina eta sorginen batzarra eta Martin Martina eta gauekoak.
